【攬炒之母窮途末路之最終回】見林鄭利用路透社放風，我就知佢氣數已盡。佢搵路透社放風，等於平時搵星島，符合佢一貫鍾意搞小動作嘅閃縮個性。但一來路透社高級啲，二來講英文大陸人唔識，衝擊會少啲 (佢以為)。
林鄭喺錄音話如果有得揀，一定辭職同深切道歉，即係中央非但唔准佢辭職，連佢想同香港人道歉都唔准。林鄭仲話反修例風波已經提升到國家主權安全層面，尤其中美貿易戰，佢同時服務中央同香港，佢嘅政治迴旋空間非常、非常有限。四個字：唔──關──我──事。
事實係，三個月來林鄭用盡所有卑鄙手段，但香港人即使頭破血流仍不退縮。林鄭無計可施，以佢極端自私嘅性格，為求自保，以為shift the blame就可以免被港人清算，但阿特首，香港人何德何能清算你？只有偉大嘅黨才有能力。真心講句，林鄭你累到老細雞毛鴨血，但老細到呢一刻仲畀機會你補鑊，都算唔話得，點知你個反骨仔居然為求自保反咬老細一口！中央栽培你，支持你，唔介意你能力有限，只望你對祖國忠誠，而你竟然陷中央於不義，仲算係中國人？！本來林鄭就算冇咗份工都可以返大陸養老，而家？着草啦。不過我想提醒林鄭你，千祁唔好以為勾結外國勢力，向美國出賣祖國情報就可以換取政治庇護，我勸你唔好狗急跳牆，與14億中國人為敵。
有冇注意到今朝林鄭遲大到？相信佢今朝被老細喝住，又或者噚晚半夜已經有人拍佢門，搞到今朝遲到。完全可以想像阿爺睇到路透社新聞，知道自己被擺上檯有幾嬲。林鄭當然有後著，路透社話有三個人證明林鄭有親口講過段錄音，呢三個傻仔好大機會其中一人係唐唐，先同佢講，嗱，你幫手同路透社confirm，我冇得撈就畀你頂上。到老細火山爆發，林鄭就賴某人好恨做下屆特首於是向外媒爆料，所以林鄭今朝話對於錄音流出好失望 (對唐唐好失望)。唐唐又被人「煽」多一鑊，已經第二次，特首寶座去到口唇邊都嘔返出嚟。
林鄭game over之後，無論邊個接任特首，為咗鞏固權力同恢復管治，非交人不可。交邊個？警察們，凡係雙手染過血，你預咗會被自己人篤灰。張建宗，交你最好，鵪春一隻，唔識反抗。李家超，做得公公，預咗武則天倒台你都要陪葬。個list太長，請自行加上去。
Search